Bir neçə bankomat partladı - Bir qız yaralandı

Son bir həftə ərzində Niderlandda bir sıra bankomat partlayışları baş verib, hadisə nəticəsində bir qız yaralanıb.

Avtosfer.az Teleqraf-a istinadən xəbər verir ki, bu barədə ANP xəbər agentliyinin məlumat yayıb.

Məlumata görə, ilk partlayış Lopik şəhərində yerləşən (Utrext əyaləti) bankomatda olub. Partlayış nəticəsində bankomatın yerləşdiyi binaya ciddi ziyan dəyib və ikinci mərtəbədəki mənzilin sakinləri təxliyə edilib. Nağd pulun oğurlanması ilə bağlı məlumatlar dəqiqləşdirilir.

Amsterdamın Nieuw-West məhəlləsində başqa bir partlayış baş verib. Bankomat tamamilə dağılıb və partlayış dalğası binanın pəncərələrini sındırıb. Hadisə nəticəsində yeniyetmə qız yaralanıb, qəlpə yaraları alıb və xəstəxanaya yerləşdirilib. Vəsaitlərin oğurlanması ilə bağlı heç bir məlumat yoxdur.

Bundan əlavə, Amsterdamın ətraf əraziləri olan Badhoevedorp və Landsmeerdə təxminən 30 dəqiqəlik bir fərqlə iki bankomat partladılıb. Birinci halda, iki şübhəli mopedlə qaçıb, lakin tezliklə Amsterdamda tutulublar. Müstəntiqlər Landsmeer partlayışında digər şəxslərin də iştirak etdiyinə inanırlar, lakin hadisələr arasında mümkün əlaqə araşdırılır.