Bu ölkənin Prezidentinə SUİ-QƏSD

Kolumbiyanın seçilmiş prezidenti Abelardo de la Espriellaya qarşı mümkün sui-qəsd planı ilə bağlı təhlükəsizlik xəbərdarlığı edilib.

Avtosfer.az RİA Novosti-yə istinadən xəbər verir ki, de la Espriellanın komandası siyasətçiyə qarşı ehtimal olunan sui-qəsd planı barədə kəşfiyyat məlumatı əldə edib. Bildirilir ki, planın arxasında Milli Azadlıq Ordusunun (ELN) və Kolumbiya İnqilabi Silahlı Qüvvələrinin (FARC) silahlılarının dayandığı ehtimal olunur.
Seçilmiş prezidentin mətbuat xidməti açıqlamasında qeyd edib ki, regional hakimiyyətin təhvil verilməsi prosesi çərçivəsində de la Espriellaya qarşı mümkün cinayətkar hücumla bağlı təhlükəsizlik orqanlarından xəbərdarlıq alınıb.

Məlumata görə, ELN və FARC üzvləri hücumun həyata keçirilməsi üçün 3 milyard Kolumbiya pesosuna (təxminən 1 milyon ABŞ dolları) qədər mükafat vəd ediblər.

Bundan əlavə, mətbuat konfranslarına və ictimai tədbirlərə, xüsusilə uşaqların və yaşlıların iştirak etdiyi tədbirlərə zorakılıq törətmək məqsədilə silahlı şəxslərin sıza biləcəyi ilə bağlı da narahatlıq ifadə olunub.

Bütün təhdidlərə baxmayaraq, Abelardo de la Espriellanın hakimiyyətin təhvil verilməsi ilə bağlı nəzərdə tutulan tədbirləri ləğv etməyəcəyi bildirilib. Onun komandası həm seçilmiş prezidentin, həm də ictimai tədbirlərdə iştirak edən vətəndaşların təhlükəsizliyinin təmin edilməsi üçün əlavə mühafizə tədbirlərinin görüləcəyini açıqlayıb.

Mətbuat xidməti hüquq-mühafizə orqanlarını təhdidlərin mənbəyini operativ şəkildə araşdırmağa, məsul şəxsləri müəyyən etməyə və seçilmiş prezidentin həyatına yönələ biləcək hər hansı hücumun qarşısını almağa çağırıb.