Çindən Qazaxıstana uçan təyyarədə qadın sərnişin öldü

Çinin Quançjou şəhərindən Almatıya (Qazaxıstan) uçan təyyarədə bir qadının öldüyü barədə sosial mediada məlumatlar yayılıb.

Avtosfer.az xəbər verir ki, Qazaxıstan Nəqliyyat Polisi Departamenti daha sonra yerli mətbuata xəbəri təsdiqləyib.

"Ölümün ilkin səbəbi xroniki xəstəlikdir. Hadisənin başvermə səbəbləri araşdırılır. Ölüm hadisəsi ilə bağlı cinayət işi açılıb", - departamentdən bildirilib.

Xəbərdə bildirilir ki, bu, son günlər baş verən ikinci oxşar hadisədir. Dekabrın 10-da Aktobe-Almatı reysində bir sərnişin təyyarədə özünü pis hiss edib. Stüardessalar dərhal ona ilkin tibbi yardım göstəriblər. Təyyarə hava limanına qayıdıb, həkimlər halı pisləşən sərnişinin həyatını xilas edə bilməyiblər.