Heydər Əliyev prospektində təhlükəli asfalt motosikletçiləri riskə atır - VİDEO

Paytaxtın Heydər Əliyev prospektində yolun asfalt örtüyünün vəziyyəti motosiklet sürücüləri üçün təhlükə yaradır.

Avtosfer.az xəbər verir ki, bununla bağlı ərazidən keçən motosiklet sürücülərindən biri sosial şəbəkə hesabında paylaşım edib.

Onun sözlərinə görə, bir neçə il əvvəl həmin ərazidə baş vermiş yol-nəqliyyat hadisəsi zamanı yola qır dağılıb. Daha sonra qır təmizlənsə də, asfalt örtüyü əvvəlki vəziyyətinə qaytarılmayıb.

Kadrlardan görünür ki, yolun hərəkət hissəsində şaquli xətlər şəklində nahamar qır qatları əmələ gəlib. Bu isə xüsusilə motosiklet sürücülərinin hərəkətini çətinləşdirir və qəza riskini artırır.

Şikayətçi bildirir ki, problemin olduğu hissə döngəyə yaxın olduğundan motosikletin təkərləri həmin xətlərə ilişə bilir. Bu zaman sürəti kəskin azaltmaq da mümkün olmur. Çünki arxadan gələn nəqliyyat vasitələri üçün təhlükəli vəziyyət yarana bilər.

Moto sürücü aidiyyəti qurumlara müraciət edərək, yolun asfalt örtüyünün bərpası və problemin aradan qaldırılması üçün tədbir görülməsini xahiş edib.

Nərmin