İki avtomobilin arasına girən moped sürücüsü təhlükəli anlar yaşadı - VİDEO

Abşeron rayonu, Xırdalan şəhərində baş vermiş təhlükəli anlar kameraya düşüb.

Avtosfer.az-ın məlumatına görə, hadisə iyunun 8-də səhər saatlarında qeydə alınıb. Görüntülərdən məlum olur ki, “BYD” markalı avtomobilin sürücüsü hərəkətdə olduğu zolaqdan sağa manevr edir. Həmin vaxt arxadan gələn moped sürücüsü qarşısındakı nəqliyyat vasitələrini ötmək məqsədilə iki avtomobilin arasından keçməyə çalışır.

Manevr zamanı mopedin təkəri əvvəlcə sağdakı avtomobilə, daha sonra isə soldakı nəqliyyat vasitəsinə dəyir. Nəticədə sürücü qısa müddətə idarəetməni itirsə də, qəza ciddi fəsadla nəticələnmir. Moped sürücüsü yıxılmadan hərəkətini davam etdirə bilir.

Qeyd edək ki, son dövrlər bəzi motosiklet və moped sürücülərinin zolaq qaydalarına əməl etmədən avtomobillərlə yanaşı, dar məsafədən hərəkət etməsi yollarda təhlükəli vəziyyət yaradır. Xüsusilə sıx nəqliyyat axını zamanı bu cür riskli manevrlər həm sürücülərin, həm də digər hərəkət iştirakçılarının həyatı üçün ciddi təhlükə hesab olunur.

Nərmin