İrandan Türkiyəyə daha bir RAKET ATILDI – Ankara HƏRƏKƏTƏ KEÇİR

Regionda gərginlik sürətlə artarkən İrandan Türkiyə istiqamətində atılan daha bir raket yeni təhlükəli ssenariləri gündəmə gətirib. Türkiyə hava hücumundan müdafiə sistemləri tərəfindən zərərsizləşdirilən raketin qalıqlarının Adıyaman bölgəsində tapılması artıq məsələni təkcə texniki hadisə yox, siyasi və hərbi təhlükəsizlik məsələsinə çevirib. Bu hadisə Ankaranın mümkün cavab addımları barədə müzakirələri də gücləndirib.  

Avtosfer.az xəbər verir ki, təhlükəsizlik analitikləri baş verənləri Türkiyənin milli təhlükəsizliyinə birbaşa təhdid kimi qiymətləndirirlər.

İrandan buraxılan raketin Türkiyə hava məkanına daxil olması faktının özü belə Ankara üçün ciddi hərbi və siyasi siqnal hesab olunur. Bu səbəbdən Türkiyənin məsələyə yalnız müdafiə mövqeyindən yanaşmayacağı ehtimalı getdikcə daha çox səsləndirilir.  

Türkiyə uzun illərdir ki, öz təhlükəsizlik doktrinasında “təhdidi mənbəyində zərərsizləşdirmək” prinsipinə üstünlük verir. Suriyada PKK və İŞİD mövqelərinə qarşı həyata keçirilən əməliyyatlar da məhz bu strategiyanın nəticəsi idi. Bu baxımdan bəzi analitiklər hesab edir ki, əgər Türkiyəyə qarşı raket hücumları davam edərsə və ya təkrarlanarsa, Ankara İran ərazisində yerləşən müəyyən raket infrastrukturlarını potensial hədəf kimi nəzərdən keçirə bilər. 

Türkiyə Silahlı Qüvvələrinin son illərdə qazandığı texnoloji üstünlüklər də bu ehtimalı daha real edir. Ankara həm pilotsuz uçuş aparatları, həm də uzaqmənzilli zərbə sistemləri ilə regionda ən güclü ordulardan birinə çevrilib. Türkiyənin “Bora” taktiki ballistik raketləri, “Akıncı” və “Aksungur” kimi ağır zərbə PUA-ları, eləcə də uzaqmənzilli hava zərbə imkanları potensial olaraq İranın sərhədə yaxın hərbi obyektlərini hədəf almağa imkan verir.  

Bununla yanaşı, Türkiyə NATO üzvüdür və bu faktor da vəziyyəti daha həssas edir. Türkiyə ərazisinə yönəlmiş raket hücumu NATO-nun kollektiv müdafiə mexanizmlərini gündəmə gətirə bilər. Bu isə məsələnin artıq yalnız iki ölkə arasında gərginlik deyil, daha geniş geosiyasi müstəviyə keçməsi deməkdir. 

Qeyd edək ki, Ankara hazırda hərbi cavabdan əvvəl diplomatik və təhlükəsizlik kanalları vasitəsilə vəziyyəti qiymətləndirir. Lakin Türkiyə rəhbərliyinin son açıqlamaları göstərir ki, ölkə sərhədlərinin və hava məkanının qorunması məsələsində heç bir güzəştə getmək niyyətində deyil.  

Prezident Rəcəb Tayyib Ərdoğan da son bəyanatlarında Türkiyənin təhlükəsizlik risklərinə qarşı bütün tədbirləri gördüyünü bildirib. Onun sözlərinə görə, regionda artan gərginlik fonunda Ankara sərhədlərin və hava məkanının qorunması üçün maksimum hazırlıq vəziyyətindədir. Bəzi sensasion ehtimalı da istisna edilmir. Belə ki, əgər İran tərəfindən Türkiyə istiqamətində yeni raket hücumları baş verərsə, Ankara “məhdud preventiv zərbə” variantını gündəmə gətirə bilər. Belə ssenaridə Türkiyənin İranın sərhədə yaxın raket buraxılış mövqelərinə və ya logistika infrastrukturuna qarşı dəqiq zərbələr endirməsi mümkün hesab olunur.  

Lakin belə addım regionda vəziyyəti daha da gərginləşdirə və genişmiqyaslı qarşıdurmaya səbəb ola bilər. Bu səbəbdən Ankara çox ehtiyatlı davranmağa çalışır. Türkiyənin əsas məqsədi bir tərəfdən öz təhlükəsizliyini təmin etmək, digər tərəfdən isə regionda daha böyük müharibənin qarşısını almaqdır. Bütün bunlara baxmayaraq, bir məsələ aydındır: Türkiyə hava məkanına yönələn raketlər Ankaranın “qırmızı xətt”lərindən biridir. Əgər bu cür hadisələr təkrarlanarsa, Türkiyənin daha sərt və gözlənilməz addımlar atması ehtimalı ciddi şəkildə gündəmə gələ bilər. Regionda gərginliyin bu qədər artdığı bir dövrdə isə hər bir yeni hadisə Yaxın Şərqdəki güc balansını dəyişə biləcək domino effekti yarada bilər. nocomment.az