Kəlbəcərdə həlak olan hərbi qulluqçumuz Yardımlıda dəfn olundu - VİDEO

Kəlbəcər rayonunun Ömər aşırımı ərazisində xidməti vəzifələrini yerinə yetirərkən bədbəxt hadisə nəticəsində həlak olan Azərbaycan Ordusunun giziri, 1996-cı il təvəllüdlü Mənsimli Rəcəb Miriş oğlu son mənzilə yola salınıb.

Avtosfer.az xəbər verir ki, hərbi qulluqçumuz doğulduğu Yardımlı rayonunun Zevin kəndində torpağa tapşırılıb.

Dəfn mərasimində rayon rəsmiləri, hərbçilər, mərhumun yaxınları və kənd sakinləri iştirak ediblər.

Xatırladaq ki, Müdafiə Nazirliyinin məlumatına görə, Ömər aşırımı istiqamətində bölgənin qarlı və buzlu olması səbəbindən iki hərbi qulluqçumuz dərəyə düşüb.

İlkin məlumatlara əsasən, gizir Rəcəb Mənsimli aşırımda yıxılan digər hərbçini xilas etməyə çalışarkən özü dərəyə yıxılaraq həyatını itirib. Hadisə zamanı xəsarət alan digər hərbi qulluqçu — Osmanov İlyas Coşqun oğlu isə dərhal tibb müəssisəsinə təxliyə edilib, vəziyyəti stabildir.

Faktla bağlı araşdırma aparılır. (Mənbə: Operativ Məlumat Mərkəzi)