Kəlbəcərdəki yanğın davam edir - VİDEO

Kəlbəcər rayonunda noyabrın 28-dən başlayan yanğın hələ də nəzarətə götürülə bilmir. İlkin olaraq rayonun dağlıq-ötlaq sahələrində yaranan alov küləyin təsiri və çətin relyef səbəbindən sürətlə genişlənib.

Avtosfer.az xəbər verir ki, yanğın artıq Yuxarı Ayrım və Otaqlı kəndlərinin ətrafına doğru yayılıb, eləcə də Laçın rayonunun yüksək dağlıq hissələrinə keçib. Ərazinin dağ-meşə xarakterli olması yanğının həm aşkarlanmasını, həm də söndürülməsini xeyli mürəkkəbləşdirir.

Fövqəladə Hallar Nazirliyi hadisə yerinə əlavə yanğınsöndürmə qüvvələri cəlb edib. Hazırda bir neçə istiqamətdə paralel şəkildə söndürmə və lokalizasiya işləri aparılır. Yanğının qarşısının alınması üçün özəl avadanlıqla təchiz olunmuş qruplar və canlı qüvvə gücləndirilmiş rejimdə çalışır.

Hazırda alovlanma ocaqları tam söndürülmədiyi üçün bölgədə təhlükə davam edir. Rəsmi qurumlar əhaliyə müraciət edərək yanğın zonasına yaxınlaşmamağı və təhlükəsizlik qaydalarına riayət etməyi xahiş ediblər.