Meksikada avtomobil partladıldı: İki polis öldü, xeyli yaralı var

Meksikanın mərkəzi hissəsində - Oxokalyente şəhərində polis şöbəsinin önündə saxlanılan avtomobilin partladılması nəticəsində azı iki hüquq-mühafizə orqanı əməkdaşı həyatını itirib.

Avtosfer.az xəbər verir ki, bu barədə "La Jornada" nəşri məlumat yayıb.

Məlumata əsasən, hadisə şəhərdə keçirilən bayram tədbirləri zamanı qeydə alınıb. Bildirilir ki, daha 15 nəfər qəlpə yaraları alıb və xəsarət alanlar arasında azyaşlı körpə də var. Zərərçəkənlərə yerli xəstəxanalarda lazımi tibbi yardım göstərilir.

İlkin ehtimallara görə, maşına partlayıcı maddə həmin ərazidə fəaliyyət göstərən mütəşəkkil cinayətkar dəstələrin üzvləri tərəfindən yerləşdirilib.

Qeyd edək ki, Oxokalyente bölgəsi, eləcə də Sakatekas ştatının mərkəz və cənub-şərqində yerləşən bir çox digər bələdiyyələr son illər narkokartellər arasındakı münaqişələrin mərkəzinə çevrilib.