Mikroavtobusda qardaşının keçmiş arvadını döyən qadına hökm oxundu

Neftçala Rayon Məhkəməsində xuliqanlıqda təqsirləndirilən Pakizə Səfərovanın (adı və soyadı şərtidir) cinayət işi üzrə məhkəmə istintaqı başa çatıb.

Avtosfer.az Pravda.az-a istinadən xəbər verir ki, hakim Ceyhun Qədimovun sədrliyi ilə keçirilən prosesdə hökm oxunub.

Məhkəmənin hökmü ilə qazancının 15 faizi məbləğində dövlət nəfinə pul tutulmaqla o, 6 ay müddətinə islah işləri cəzasına məhkum edilib.

İttiham aktına əsasən, hadisə 27 aprel 2025-ci il tarixdə, saat 17:30-da Neftçala-Bankə marşrutu üzrə hərəkətdə olan "Mercedes-Benz" markalı mikroavtobusda qeydə alınıb.

Belə ki, Pakizə Səfərova mikroavtobus hərəkətdə olarkən, heç bir əsaslı səbəb olmadan orada səs-küy salaraq nalayiq ifadələr işlədib. Sonra o, nəqliyyat vasitəsində sərnişin olan, qardaşının keçmiş arvadı, zərərçəkmiş Mahirə Kərimzadənin (adı və soyadı şərtidir) saçından tutub, yumruqla sifət nahiyəsinə zərbə vuraraq ona xəsarətlər yetirib.

Daha sonra Pakizə Səfərova saxlanılıb və barəsində başqa yerə getməmək haqqında iltizam növündə qətimkan tədbiri seçilmişdi.