Möcüzə vəd edilən biznes layihəsi vətəndaşı məəttəl qoydu - 128 minlik dələduzluq

"Alisiya möcüzələr diyarında" adlı proyekti quracağı ilə bağlı vətəndaşa qarşı külli miqdarda dələduzluq etməkdə təqsirləndirilən Seymur Seyaginin barəsindəki cinayət işi üzrə məhkəmə davam etdirilib. Avtosfer.az-ın Oxu.az-a istinadən məlumatına görə, Bakı Ağır Cinayətlər Məhkəməsinin hakimi Kamil Əliyevin sədrliyi ilə keçirilən iclasda tərəflər arasında barışıq əldə edildiyi məlum olub. Bu barədə məhkəmə tərkibinə ərizə təqdim edilib. Zərərçəkmiş Etimad Mehdiyev bildirib ki, təqsirləndirilən şəxs bütün dəymiş ziyanı ödəyib və ona qarşı heç bir şikayəti, tələbi yoxdur. Daha sonra sübutların tədqiqinə başlanılıb və məhkəmə istintaqı yekunlaşıb. Dövlət ittihamçısı çıxış üçün məhkəmədən vaxt istəyib. Bu səbəbdən məhkəmə iyunun 12-dək təxirə salınıb. Seymur Seyagi bildirib ki, özünü təqsirli bilir və əməlindən peşmandır.

Qeyd edək ki, ona qarşı Cinayət Məcəlləsinin 178.3.2-ci (dələduzluq-külli miqdarda ziyan vurmaqla törədildikdə) maddəsi ilə ittiham irəli sürülüb. Ümumi dəymiş ziyan isə 128 min manatdır.