Novxanıda restoranda baş verən yanğın söndürüldü - FOTO - VİDEO - YENİLƏNİB

Fövqəladə Hallar Nazirliyinin (FHN) "112" qaynar telefon xəttinə Abşeron rayonu, Novxanı kəndində restoranda yanğın baş verməsi barədə məlumat daxil olub.

Bu barədə Oxu.Az-ın sorğusuna cavab olaraq Fövqəladə Hallar Nazirliyinin Mətbuat Xidmətindən bildirilib.

Məlumatda qeyd olunub ki, yanğının FHN-in Dövlət Yanğından Mühafizə Xidmətinin Sumqayıt şəhər Yanğından Mühafizə İdarəsinin qüvvələri tərəfindən genişlənməsinə, o cümlədən bitişik tikilən hotelə yayılmasına imkan verilmədən qısa müddətdə söndürülüb:

"FHN qüvvələrinin çevik müdaxiləsi sayəsində restoranın dam örtüyündə baş verən yanğın genişlənməsinə imkan verilmədən qısa müddətdə söndürülüb".

"Yanğın nəticəsində ümumi sahəsi 2000 kv.m olan restoranın birinci mərtəbəsinin terrasının dam örtüyünün yanar konstruksiyaları 70 kv.m sahədə yanıb. Restoranın böyük hissəsi və bitişik hotel yanğından mühafizə olunub", - məlumatda qeyd edilib.

***10:23

Sumqayıtda "Siyans" hoteli yanır.

Avtosfer.az "Report"a istinadən  xəbər verir ki, əraziyə Fövqəladə Hallar Nazirliyinin Dövlət Yanğından Mühafizə Xidmətinin canlı qüvvələri və texnikaları cəlb olunub.

Hazırda yanğının söndürülməsi istiqamətində operativ tədbirlər görülür.