Polis öz avtomobilini oğurlayan kişini saxlayıb

Almaniyanın Manhaym şəhərinin sakini daha əvvəl Rumıniyaya səfəri zamanı qaçırılmış şəxsi avtomobilini özü oğurlayıbmış. Polis həmin şəxsi saxlayıb, lakin onun cinayət törədib-törətmədiyinə dair hələ qərar verməyib.

Avtosfer.az-ın Oxu.az-a istinadən xəbərinə görə, bu barədə DPA agentliyi məlumat yayıb.

27 yaşlı sakinin “BMW” markalı avtomobili oğurlananda bu barədə Rumıniya polisinə məlumat verib. Bir neçə həftə sonra maşın Dortmund sakini tərəfindən satın alınıb və geolokasiya məlumatları sayəsində ilk sahibi avtomobilin yerini müəyyən edib.

O, bu barədə polisə məlumat verməyərək, Dortmund şəhərinə gedib və avtomobili öz açarı ilə açaraq, yenidən Manhayma qayıdıb.

Avtomobilin yeni sahibi polisə müraciət edib və polis də nəqliyyat vasitəsinin yerini müəyyən etmək üçün geolokasiyadan istifadə edərək onu qaçıranı saxlayıb.

Yeni sahib həmçinin polisə avtomobili 2017-ci ildə Böyük Britaniyada aldığını təsdiq edən sənədləri təqdim edib. "Hazırda hər şey iki zərərçəkmiş şəxsin olduğuna dəlalət edir", - deyə Dortmund polisinin sözçüsü agentliyə bildirib.