Qadın sürücü saxta polis avtomobilində tutuldu

Almaniyanın Niderlandla sərhədindəki Kaldenkirxen şəhərində gecə saatlarında polis avtomobilinə bənzəyən BMW saxlanılıb.

Avtosfer.az xəbər verir ki, ağ-yaşıl zolaqlı polis avtomobilləri Almaniyada 2000-ci illərin əvvəllərinədək istifadə edilib. Lakin, qanun keşikçilərinin diqqətini orfoqrafik səhv daha çox cəlb edib: kapotun üzərində “Polizei” (polis) əvəzinə “Polisei” yazılıb.

Yoxlama zamanı nömrə nişanının saxta olduğu, nəqliyyat vasitəsinin isə heç bir yerdə qeydiyyatda olmadığı üzə çıxıb. 27 yaşlı qadın sürücü izahatında bildirib ki, maşını servisə aparır və sığortasız avtomobil idarə etməyin qanunsuz olduğunu bilmir. Polis bu izahatı inandırıcı hesab etməyib. Çünki gecə saatlarında heç bir təmir müəssisəsi xidmət göstərmir.

Faktla bağlı cinayət işi açılıb.

Vüqar