Səbailin icra başçısı inzibati xəta törədib - Cərimə oluna bilər

"Bəzi kütləvi informasiya vasitələrində Səbail Rayon İcra Hakimiyyətinin başçısının inzibati xəta törətməsi və cərimə olunması barədə yayılan məlumatlar tamamilə əsassızdır və həqiqəti əks etdirmir".

Avtosfer.az xəbər verir ki, bu açıqlama Oxu.Az-a Səbail Rayon İcra Hakimiyyətindən verilib.

"Bildiririk ki, Azərbaycan Respublikasının qanunvericiliyinə əsasən, şəxsin inzibati məsuliyyətə cəlb edilməsi yalnız qanunla müəyyən olunmuş əsaslar və müvafiq hüquqi prosedurlar çərçivəsində, səlahiyyətli orqanın rəsmi qərarı ilə həyata keçirilir", - deyə məlumatda bildirilir.

***13:36

Səbail Rayon İcra Hakimiyyətinin başçısı Vüqar Zeynalovla bağlı inzibati protokol tərtib olunub.

Avtosfer.az Xitab24.az-a istinadən xəbər verir ki, icra başçısı ilə bağlı İnzibati Xətalar Məcəlləsinin 528.1-ci maddəsi ilə protokol tərtib olunaraq məhkəməyə göndərilib.

İşə baxış zamanı müəyyən edilib ki, eyni vaxtda baş vermiş hadisəyə görə Səbail Rayon İcra Hakimiyyətinin başçısı barəsində həmin maddə ilə daha bir inzibati xəta haqqında protokol tərtib edilərək məhkəməyə göndərilib və iş məhkəmənin icraatındadır. Məhkəmə hesab edib ki, hazırki iş icraatda olan digər işlə birləşdirilməlidir.

Qeyd edək ki, İnzibati Xətalar Məcəlləsinin 528.1-ci maddəsi məhkəmə və digər orqanların qərarlarının icrası ilə əlaqədar icra məmurunun tələblərinin yerinə yetirilməməsi haqqındadır. Vüqar Zeynalovun hansı qanuni tələbi yerinə yetirmədiyi hələlik məlum deyil.

Əlavə edək ki, bu maddətinin tələblərini pozan vəzifəli şəxslər 1200-2500 manat məbləğində cərimə olunurlar.

Xatırladaq ki, V.Zeynalov 2018-ci ildən Səbail rayonunun icra başçısıdır.