Sərnişin avtobusunun yararsız təkərlə xəttə çıxması iddiası ilə bağlı AÇIQLAMA - VİDEO

Bakıda sərnişin avtobusunun təkərinin yararsız halda xəttə çıxdığı iddia olunub.

Avtosfer.az oxu.az-a istinadən xəbər verir ki, bununla bağlı videogörüntü yayımlanıb.

İddia edilib ki, sərnişinlərlə dolu avtobusun təkəri cırılmış vəziyyətdə olub.

Məsələ ilə bağlı "BakuBus" MMC-nin mətbuat katibi Əsmər Əliyeva bildirib ki, videogörüntü ilə bağlı məsələ araşdırılıb.

"Yoxlamanın nəticələrinə əsasən, avtobusun təkərlərində protektor hündürlüyünün normativ tələblərlə müəyyən edilmiş minimum 4 mm göstəricidən aşağı olmadığı müəyyən edilib.

Bildiririk ki, sərnişindaşımada Nazirlər Kabinetinin müvafiq qərarına əsasən, avtobus təkərinin protektor hündürlüyü 4 mm-dən aşağı olduqda həmin təkər normativ tələblərə uyğun hesab edilmir.

Görüntüdə əks olunan avtobusa 2026-cı il iyunun 8-də istismar müddəti üzrə 60 000 km yürüş intervalına uyğun texniki xidmət göstərilib. Həmçinin 2026-cı il avqustun 24-də avtobusun təkərlərində protektorlar yoxlanılıb. Yoxlama zamanı arxa təkərlərdə ən aşağı protektor hündürlüyü 7 mm, ön təkərlərin protektor hündürlüyü isə əsasən 10-13 mm aralığında olub.

Ona görə də bu kimi görüntüləri paylaşan şəxslərdən məlumatların dəqiq faktlara əsaslanmasına diqqət yetirmələrini və əsası olmayan, yanlış təsəvvür yarada biləcək məlumatların ictimaiyyətə təqdim edilməməsini xahiş edirik", - deyə Ə.Əliyeva bildirib.