Sırğasını satıb oğlunu işə düzəltmək istədi - Dələduzluğa məruz qaldı

Bakıda 1500 manat müqbilində Ədliyyə Nazirliyinə mayor rütbəsində "işə” düzəldən şəxs cəzalandırılıb. Avtosfer.az-ın "Qaynarinfo"ya istinadən məlumatına görə, 1983-cü il təvəllüdlü Samir Məmmədov saxlanılaraq barəsində İnzibati Xətalar Məcəlləsinin 227-ci maddəsi ilə protokol tərtib edilib və işə məhkəmədə baxılıb. Məlum olub ki, S.Məmmədov V.N. adlı zərərçəkmiş qadından 1500 manat pul alaraq onun oğlunu mayor rütbəsində Ədliyyə Nazirliyinə işə düzəldəcəyinə söz verib. O, həmin pulları Binəqədi rayonunda Mərkəz adlanan ərazidə zərərçəkmiş qadından götürüb. Qızıl sırğasını satıb pulunu təqsirləndirilən şəxsə verən V.N. sonradan Samir tərəfindən dələduzluğa məruz qaldığını anlayaraq polisə şikayət verib. Məhkəmənin hökmü ilə S.Məmmədovu İnzibati Xətalar Məcəlləsinin 227-ci maddəsində nəzərdə tutulmuş inzibati xətanı törətməkdə təqsirli bilib və barəsində 180 saat müddətində ictimai işlər tənbeh tədbiri tətbiq edib.