"Temu" adı ilə dələduzluq

Bakıda "Temu” platforması üzərindən ucuz geyim satışı vədi verərək vətəndaşların pulunu ələ keçirməkdə təqsirləndirilən şəxsə məhkəmə hökmü oxunub.

Avtosfer.az-ın Qaynarinfo-ya istinadən məlumatına görə, təqsirləndirilən şəxs Mahir Muradov (şərti) 2024-cü ilin sonlarından etibarən sosial şəbəkələrdə özünü işgüzar satıcı kimi təqdim edərək Türkiyədən qadın geyimlərinin endirimli qiymətlərlə gətirilib satıldığını iddia edib. O, bu yalan vədlərlə iki zərərçəkmiş şəxsi inandıraraq onlardan hissə-hissə pul alıb.

İttihama görə, zərərçəkmişlərdən biri ümumilikdə 850 manat, digəri isə 632 manat məbləğində pul vəsaiti ödəyib. Lakin təqsirləndirilən şəxs vəd etdiyi məhsulları təqdim etməyib və əldə olunan vəsaiti şəxsi ehtiyaclarına sərf edib.

İstintaq zamanı müəyyən edilib ki, o, bank kartları və mobil köçürmələr vasitəsilə müxtəlif məbləğlərdə ödənişlər qəbul edərək vətəndaşları sistemli şəkildə aldadıb.

Məhkəmə prosesində təqsirləndirilən şəxs ittihamı qəbul edərək əməlini etiraf edib və peşman olduğunu bildirib. O, ilk dəfə cinayət məsuliyyətinə cəlb olunduğunu qeyd edərək yüngül cəza istəyib.

Məhkəmənin hökmü ilə o, Cinayət Məcəlləsinin 178.2.2-ci maddəsi (dələduzluq) ilə təqsirli bilinib və 1 il 9 ay müddətinə azadlığın məhdudlaşdırılması cəzasına məhkum edilib. Qanunvericiliyə uyğun olaraq onun saxlanma və həbsdə keçirdiyi müddət nəzərə alınaraq, cəza 1 il 6 ay 20 gün olaraq müəyyən edilib.