Tufandağa istirahətə gedənlər dağ kosteri xəttində qaldı; heç kim kömək etmədi - VİDEO

Havaların soyuması ilə Azərbaycanda qış turizmi mövsümü aktivləşib. Lakin bəzi istirahət mərkəzlərində təhlükəsizliklə bağlı problemlər turistlərin narazılığına səbəb olur.

Avtosfer.az xəbər verir ki, “Tufandağ” Qış-Yay Turizm Kompleksinə istirahət məqsədilə gələn turistlər dağ kosteri yolunda uzun müddət qalıblar. Hadisə zamanı dağ kosterinin hərəkəti dayanıb və yerli turistlər soyuq hava şəraitində kömək gözləmək məcburiyyətində qalıblar.

Turistlər baş verənləri sosial şəbəkə hesablarında paylaşaraq, uzun müddət ərzində heç kimin onlara yaxınlaşmadığını, hələ də gözlədiklərini bildiriblər. Paylaşımlarda dağ kosterinin yolunda texniki nasazlıq olduğu, lakin operativ müdaxilənin gecikdiyi iddia olunur.

Qeyd edək ki, oxşar hadisə təxminən bir həftə əvvəl də baş verib. Həmin vaxt da turistlərin saatlarla dağ kosteri yolunda, aşağı temperaturda qaldığı bildirilmişdi. Bu isə dağ kosteri xətlərinin texniki vəziyyəti və təhlükəsizlik tədbirlərinin yetərli olub-olmaması ilə bağlı suallar yaradır.

Məsələ qış turizmi mövsümünün ən aktiv dövründə istirahət mərkəzlərində texniki baxışların vaxtında aparılmasının və fövqəladə hallara çevik reaksiya mexanizmlərinin vacibliyini bir daha gündəmə gətirir. 

Eltac Zülfüqaroğlu