Turist yol polisinə bıçaqla hücum etdi; qaçarkən ayağından vuruldu – VİDEO

İstanbulun Fatih rayonunda yol polisi bıçaqlı hücuma məruz qalıb.

Avtosfer.az xəbər verir ki, hadisə saat 17:00 radələrində Aksaray məhəlləsində baş verib. Məlumata görə, ərazidə xidmət aparan yol polisinin yanına sual vermək bəhanəsi ilə yaxınlaşan şəxs qəfil ona bıçaqla hücum edib.

Polis əməkdaşı son anda geri çəkilərək hücumdan yayınıb. Daha sonra “dayan” əmrinə tabe olmayan şübhəli qaçmağa başlayıb. Polis əməkdaşı onun ayağına atəş açaraq hərəkətini məhdudlaşdırıb. Yaralanmasına baxmayaraq qaçmağa davam edən şübhəli təqib nəticəsində saxlanılıb.

Polis tərəfindən saxlanılan şəxsin xarici ölkə vətəndaşı olduğu müəyyənləşdirilib. Onun üzərində aparılan axtarış zamanı müəyyən miqdarda narkotik vasitə də aşkarlanıb.

Bıçaqlı hücum anı polis avtomobilinin kamerası tərəfindən qeydə alınıb.

Eltac Zülfüqaroğlu