Türkiyədə taksi tətbiqində dəhşət iddiası: "Mənə toxundu, etiraz edəndə məni magistral yolda düşürdü" - VİDEO

Türkiyədə avtomobil çağırma tətbiqi vasitəsilə sifariş etdiyi nəqliyyat vasitəsində səfər edən gənc qadın sürücünün ona cinsi xarakterli hərəkətlər etdiyini, etiraz etdikdən sonra isə magistral yolda avtomobildən düşürüldüyünü iddia edib.

Avtosfer.az xarici mediaya istinadla xəbər verir ki, sosial şəbəkədə paylaşdığı videoda göz yaşları içində yaşadıqlarını danışan qadın bildirib ki, hadisədən sonra böyük qorxu keçirib və insanlara olan etibarını itirib.

Onun sözlərinə görə, avtomobil çağırma tətbiqi vasitəsilə sifariş etdiyi nəqliyyat vasitəsində gedərkən sürücü avtomobili magistral yola çəkib. Qadın iddia edib ki, bir müddət sonra sürücü onun ayağına toxunub. O, buna etiraz etdikdə isə sürücü heç nə etmədiyini və vəziyyəti yanlış başa düşdüyünü söyləyib.

Gənc qadın sürücüdən avtomobili saxlamasını xahiş etdiyini bildirib. İddiasına görə, sürücü onu magistral yolun ortasında avtomobildən düşürüb.

Videoda danışan qadın yaşadığı hadisədən sonra ciddi psixoloji sarsıntı keçirdiyini, özünü təhlükəsiz hiss etmədiyini və insanlara olan inamının sarsıldığını vurğulayıb.

Qeyd edək ki, səsləndirilən iddialarla bağlı hələlik aidiyyəti qurumlar və sözügedən avtomobil çağırma tətbiqi tərəfindən rəsmi açıqlama verilməyib.

Hadisə ilə bağlı hüquqi və ya inzibati araşdırmanın başlanılıb-başlanılmadığı da məlum deyil./Sonxeber.az