Xırdalanda aylardır qapaqsız qalan lyuk budaq və daşlarla nişanlandı - VİDEO

Abşeron rayonu, Xırdalan şəhəri, Heydər Əliyev prospektində sürücülər üçün təhlükəli vəziyyət yaranıb.

Avtosfer.az-ın məlumatına görə, ərazidən keçən sürücülərdən biri qarşılaşdığı mənzərəni videoya çəkərək sosial şəbəkədə paylaşıb. Kadrlardan görünür ki, yolun hərəkət hissəsində yerləşən kanalizasiya lyuklarından birinin qapağı yoxdur.

Vətəndaşlar baş verəcək qəzaların qarşısını almaq məqsədilə açıq lyukun ətrafına daşlar düzüb, üzərini isə ağac budaqları ilə örtərək sürücülərə xəbərdarlıq etməyə çalışıblar. Buna baxmayaraq, həmin ərazidə hərəkət edən sürücülər çətinliklə manevr edir və təhlükə ilə üzləşirlər.

Şikayətçinin sözlərinə əsasən, prospektdə bir neçə kanalizasiya lyuku uzun müddətdir qapaqsız vəziyyətdə qalıb. Bildirilir ki, məsələ ilə bağlı indiyədək aidiyyəti qurumlar tərəfindən hər hansı tədbir görülməyib.

Qeyd edək ki, xüsusilə gecə saatlarında və ya intensiv hərəkət zamanı açıq kanalizasiya lyukları həm avtomobillər, həm də piyadalar üçün ciddi təhlükə yaradır. Belə halların vaxtında aradan qaldırılmaması ağır yol-nəqliyyat hadisələrinə səbəb ola bilər.

Nərmin