Ən uzunömürlü qan qrupu açıqlandı

Tədqiqatçılar 100 yaşdan yuxarı fərdlər üzərində apardıqları araşdırmalar zamanı qan qrupları ilə ömür uzunluğu arasında diqqətçəkən əlaqə aşkarlayıblar.

Avtosfer.az xəbər verir ki, araşdırmaya görə, 0 (O) qan qrupu digərləri ilə müqayisədə daha uzunömürlülüklə əlaqələndirilir. Mütəxəssislər bildirirlər ki, təkcə qan qrupu uzun ömür üçün həlledici amil olmasa da, sağlam həyat tərzi ilə birlikdə bu faktor mühüm rol oynaya bilər.

Aparılan elmi tədqiqatlarda 0 qan qrupuna malik şəxslərin bir çox xəstəliklərə qarşı daha davamlı olduğu müəyyən edilib. Qan qrupları yüksək təzyiq, yoluxucu xəstəliklər və xərçəng riski ilə əlaqələndirilir və 0 qan qrupu ümumilikdə ən sağlam qan qrupu hesab olunur.

Böyük Britaniyada aparılan yeni araşdırmada London Universitetinə bağlı Royal Holloway Universitetinin alimləri qan qrupları ilə müxtəlif xəstəliklər arasında əlaqə tapıblar. Tədqiqat qan qrupunu müəyyən edən genlərin beyində qan laxtalanması riski (CVT) ilə əlaqəli ola biləcəyini göstərib.

882 nəfər üzərində aparılan araşdırmada AB qan qrupuna malik şəxslərdə CVT riskinin digər qruplara nisbətən orta hesabla 5,6 dəfə yüksək, 0 qan qrupunda isə bu riskin yarıbayarı az olduğu müəyyən edilib.

Vorvik Universitetinin virusoloqu və molekulyar onkologiya professoru Lorens Yanq qeyd edib ki, qan qrupunu müəyyən edən molekullar qan laxtalanma mexanizminə birbaşa təsir göstərə bilər. Onun sözlərinə görə, hüceyrə membranındakı zülallar ürək-damar xəstəliklərinə həssaslığı artıra və ya azalda bilər.

Mütəxəssislər xatırladırlar ki, 100 yaşına çatan insanların ortaq xüsusiyyətləri arasında müntəzəm fiziki aktivlik, balanslı qidalanma, stressin düzgün idarə olunması, güclü sosial əlaqələr, həyata müsbət baxış və genetik amillər mühüm yer tutur. Qan qrupu isə bu amillərdən yalnız biri hesab olunur.