“Mercedes”dən gülməli addım: jurnalda “sürücü axtarılır” elanı verdi

Mercedes komandası 2017-ci il üçün sürücü axtarışlarını davam etdirir və almanlar Britaniyanın “Autosport” jurnalına “sürücü axtarılır” elanı veriblər.

Avtosfer.az “f-1.az”a istinadən xatırladır ki, Rosberq təqaüdə çıxdığını açıqladıqdan sonra “Mercedes”də bir yer boş qalıb. Amma almanlar sürücü axtarışında gülməli addım atıblar və “Autosport” jurnalına “sürücü axtarılır” elanı veriblər.

Elan belədir: “Komandamızda sürücü vakansiyası var. Müraciət edənlər trasda düzgün əylənməyi, döngəyə girməyi və ən vacibi sürətlənməyi bilməlidirlər. FİA-nın super lisenziyası olanlara üstünlük veriləcək. İşə qəbul edəcəyimiz sürücünü həyat siğortası, “Mercedes” avtomobili, şirkətin idman zalı və yeməkxana kimi üstünlüklər gözləyir”.

Qeyd edək ki, “Formula1” komandaları “Autosport” jurnalına mexanik, mühəndis, katibə kimi vakansiya elanları verirlər. “Mercedes” bu ənəni pozmayıb və yarış sürücüsü üçün də elan verib.