Avtobusların yanından keçərkən bunu etməyin - Mütəxəssisdən sürücülərə XƏBƏRDARLIQ – VİDEO

Qəza əleyhinə kursların məşqçisi Aqil Rəhimov sürücülərə avtobusların yanından keçərkən daha diqqətli olmağı tövsiyə edib.

Avtosfer.az xəbər verir ki, onun sözlərinə görə, bir çox insan avtobus dayanacaqları yaxınlığında yolu keçərkən təhlükəsizlik qaydalarına tam əməl etmir və bu da qəza riskini artırır.

Aqil Rəhimov bildirib ki, nəzəri baxımdan piyadaların avtobusun arxa hissəsindən yolu keçməsi daha təhlükəsiz hesab olunur. Lakin müşahidələr göstərir ki, insanların əksəriyyəti avtobusun ön hissəsindən çıxmağa üstünlük verir. Bu isə sürücülər üçün gözlənilməz vəziyyət yaradır və qəza ehtimalını artırır.

Xüsusilə yağışlı hava şəraitində sürücülərin daha ehtiyatlı davranmasının vacibliyini vurğulayıb. Belə havalarda yolun sürüşkən olması və görünüş məsafəsinin azalması səbəbindən sürəti aşağı salmaq lazımdır.

“Yağışlı hava şəraitində sürəti ən azı 10-15 km/saat azaltmaq tövsiyə olunur. Avtobusların yanından keçərkən isə mümkün qədər ehtiyatlı olmaq, təhlükəsiz məsafə saxlamaq və sürəti təxminən 20 km/saata qədər endirmək məqsədəuyğundur. Əlbəttə, yol nişanlanmasının tələbləri pozulmamalıdır. Lakin sürücülər nəzərə almalıdırlar ki, avtobusun qarşısından qəfil piyada çıxa bilər”, – deyə o qeyd edib.

Sürücülər bəzən arxadan gələn nəqliyyat vasitələrinin siqnal verməsi və ya tələsməsi səbəbindən sürəti azaltmaqdan çəkinirlər. Halbuki əsas məqsəd mümkün qəzanın qarşısını almaqdır.

Mütəxəssis hesab edir ki, avtobus dayanacaqları yaxınlığında hərəkət edən sürücülər hər an piyadanın yola çıxa biləcəyini nəzərə almalı, xüsusilə uşaqların və yaşlı insanların davranışlarını əvvəlcədən proqnozlaşdırmağa çalışmalıdırlar. Ehtiyatlı sürücülük həm piyadaların, həm də digər hərəkət iştirakçılarının təhlükəsizliyinin təmin edilməsində əsas amillərdən biridir.

Eltac Zülfüqaroğlu