Binəqədidəki bu küçədə diqqətli olun; sağa dönənlər cərimələnəcək – VİDEO

Sürücüləri bir çox məqamlarda narahat edən əsas məsələ məhz yol polisin hansı hallarda onu saxlama icazəsinin olmasıdır.

Yəni, qanunvericilikdə yol polisi sürücüləri nə baş verərsə, saxlaya bilər?

Avtosfer.az xəbər verir ki, “Yol hərəkəti haqqında” Qanunun 85-ci maddəsi, habelə “Yol-patrul xidməti haqqında” Təlimat yol-patrul xidmətinin əməkdaşı tərəfindən sürücülərdən nəqliyyat vasitəsinin dayandırılması tələbinin əsaslarını müəyyən edir.

Nəqliyyat vasitəsini idarə edən şəxslərdən (yəni sürücülərdən) yalnız aşağıdakı hallarda nəqliyyat vasitəsini (yəni misal üçün avtomobili) dayandırmaq tələb oluna bilər (“Yol hərəkəti haqqında” Qanunun 85-ci maddəsi):

1) nəqliyyat vasitəsini idarə edən şəxs tərəfindən yol hərəkəti qaydalarının və ya yol hərəkəti təhlükəsizliyinin təmin edilməsi qaydalarının pozulduğu vizual şəkildə aşkar edildikdə;

2) törədilmiş inzibati xətaya görə tətbiq olunan inzibati cərimənin ödənilməsi barədə qərar qanuni qüvvəyə mindiyi gündən 2 ay müddətində həmin qərarın icra olunmamasına görə nəqliyyat vasitəsinin saxlanılması barədə məhkəmə və ya Baş Dövlət Yol Polisi İdarəsinin, Bakı şəhəri Baş Polis İdarəsinin Dövlət Yol Polisi İdarəsinin yaxud Bakı Nəqliyyat Agentliyinin qərarı olduqda;

3) nəqliyyat vasitəsini idarə edən şəxs tərəfindən inzibati xətanın törədilməsi barədə radio-cihaz vasitəsilə Daxili İşlər Nazirliyinin digər əməkdaşından məlumat daxil olduqda;

4) nəqliyyat vasitəsi axtarışda olduqda;

5) nəqliyyat vasitəsini idarə edən şəxs və ya onunla birlikdə olan sərnişin tərəfindən cinayətin törədilməsi və ya cinayətin törədilməsində şübhələnilməsi haqqında dəqiq məlumat olduqda;

6) qanunla müəyyən edilmiş hallarda nəqliyyat vasitəsindən istifadə etmək zərurəti yarandıqda (bu hallara təcili tibbi yardım göstərmək üçün eyni səmtə gedən səhiyyə işçilərinə, yol-nəqliyyat hadisələri və ya nasazlıq nəticəsində zədələnmiş nəqliyyat vasitələrinin daşınması üçün (yalnız yük daşıyan nəqliyyat vasitələrini), təbii fəlakət yerlərinə getmək üçün, hərbi vəziyyət elan edildikdə).

Nəqliyyat vasitəsinin dayandırılması fit və jezllə işarə verməklə və ya səsgücləndirici cihaz vasitəsilə nəqliyyat vasitəsini idarə edən şəxsin aydın görə və ya eşidə biləcəyi şəkildə tələb edilməlidir.

Sürücülərin yol polisi tərəfindən saxlanılıb cərimələnməsi hallarından biri də Binəqədi rayonunda Süleyman Sani Axundov və Əhməd Rəcəbli küçələrinin kəsişməsində yaşanır. Təlimçi Azər Quliyev həmin kəsişmədə sürücülərin niyə cərimələnməsi ilə bağlı məsələyə aydınlıq gətirib. O bildirib ki, S.S.Axundov küçəsindən Ə.Rəcəbli küçəsinə döngədə məcburi sağa və düzünə yol nişanı qoyulub. Bu halda sürücülər sağa dönəndə dönmə işıqlarını yandırmırlar, belə olan halda da Əhməd Rəcəbli küçəsində dayanan yol-patrul xidməti əməkdaşları sürücüləri saxlayır.

“Bilirik ki, yol-patrul xidməti əməkdaşları sürücüləri 6 halda saxlaya bilər. Sənədləri yoxlamaq üçün yalnız stasionar postlarda bu mümkündür. Birinci halda qeyd edilir ki, nəqliyyat vasitəsini idarə edən şəxs tərəfindən yol hərəkəti qaydalarının və ya yol hərəkəti təhlükəsizliyinin təmin edilməsi qaydalarının pozulduğu vizual şəkildə aşkar edildikdə yol-patrul xidməti əməkdaşı sürücünü saxlaya bilər. Əvvəllər bu bənddə qeyd edilirdi ki, xüsusi texniki vasitələrin köməyi ilə də aşkar edildikdə saxlaya bilərdi. Artıq o bənd ləğv edilib. Artıq bununla əlaqədar sürücü saxlanıla bilməz. Çünki onda sürücüyə birbaşa cərimə göndərilir. Lakin dönmə işığını yandırmadan dönmək visual aşkarlana bilən haldır. Sual verirlər ki, bu hissədə 4.1.4 yox, 4.1.2, yəni məcbur sağa dönmə nişanı olsa necə olardı? Yəni nişan qoyulub və o, yalnız sağa dönməni əmr edir, bu halda dönmə işıqları yandırılmalıdırmı? Cavab isə odur ki, bəli, yandırılmalıdır”

Daha ətraflı aşağıdakı videoda:

Səfər