Bu halda dairədəki maşına yol verməməyə görə CƏRİMƏ YAZILA BİLMƏZ - VİDEO

Dairəvi hərəkət təşkil edilmiş yolayrıcları ən mürəkkəb kəsişmə yerlərindən biri hesab olunur. Bu yolayrıclarında hərəkət üstünlüyü müxtəlif formada təşkil oluna bilər. Öncə qeyd edək ki, dairəvi hərəkət təşkil edilmiş yolayrıcını bildirmək üçün mütləq şəkildə müvafiq 4.3 nişanı quraşdırılmalıdır. Bu nişan tək quraşdırıldığı halda yolayrıcına daxil olan sürücü dairə boyunca hərəkət edən nəqliyyat vasitələrinə yol verməlidir. Baş yol nişanı ilə tətbiq olunduğu halda isə yolayrıcına daxil olan sürücü üstünlüyə malik olur.

Bəs dairəvi hərəkət təşkil edilmiş yolayrıcını bildirən 4.3 nişanı yoxdursa, kim-kimə yol verməlidir?

Qeyd edək ki, 4.3 nişanı olmadığı hallarda həmin kəsişmə yeri dairəvi hərəkət təşkil edilmiş yolayrıcı hesab olunmur və həmin qaydalar da qüvvədə olmur. Belə olan halda adi yolayrıcının keçilməsi qaydası tətbiq edilir. Yəni, hər bir sürücü sağdan yaxınlaşan nəqliyyat vasitələrinə yol verərək hərəkət etməlidir. 4.3 nişanı olmayan yerdə sürücülərdən dairədəki nəqliyyat vasitələrinə yol verilməsinin tələb edilməsi qanuna ziddir.

Fərid