İlan sancması zamanı nə etməli? – Vacib ilk yardım qaydaları

Yay mövsümünün başlaması ilə ilanların yaşayış məntəqələrinə yaxın ərazilərdə görünməsi halları artıb. İsti hava şəraiti ilanların daha aktiv olmasına səbəb olur. Xüsusilə otlu, kolluq və kənd təsərrüfatı sahələrində çalışan şəxslərə diqqətli olmaq tövsiyə edilir.

Avtosfer.az xəbər verir ki, ilan sancması zamanı vaxt itirmədən tibbi yardıma müraciət etmək vacibdir. Özbaşına müdaxilə və ya yanlış üsullar vəziyyəti daha da ağırlaşdıra bilər.

İlan sancması zamanı ilk növbədə sakit qalmaq və dərhal tibbi yardıma müraciət etmək vacibdir.

Aşağıdakı addımlar tövsiyə olunur:

* Zərərçəkəni hərəkətsiz saxlamağa çalışın. Hərəkət zəhərin bədəndə daha sürətli yayılmasına səbəb ola bilər.

* Sancılan nahiyəni ürək səviyyəsindən aşağıda saxlayın.

* Üzük, saat və ya sıx əşyaları çıxarın. Şişkinlik yarana bilər.

* Yaraya toxunmayın, kəsməyin və zəhəri sormağa çalışmayın.

* Turniket bağlamayın və buz tətbiq etməyin.

* Mümkün qədər tez təcili tibbi yardım çağırın və ya xəstəxanaya çatdırın.

Əgər ilan təhlükəsiz məsafədədirsə, onun rəngini və görnüşünü yadda saxlamaq həkimlər üçün faydalı ola bilər. Lakin ilanı tutmağa və ya öldürməyə çalışmaq olmaz./azxeber.com