Maşının ömrünü 300 min kilometrə qədər uzatmaq istəyirsizsə, bunu etməlisiniz – Təlimçidən TÖVSİYƏ

Müasir avtomobillər 300 min kilometrdən artıq yol qət etmək potensialına malik olsa da, sürücülərin buraxdığı sadə, lakin ciddi səhv bu imkanın qarşısını alır. 

Avtosfer.az xəbər verir ki, təlimçi Anam Barkan milyonlarla sürücünün əhəmiyyət vermədiyi, amma mühərrikin ömrünü əhəmiyyətli dərəcədə qısaldan həmin səhvi açıqlayıb.

Ekspertin sözlərinə görə, ən geniş yayılmış problem müntəzəm texniki xidmətin, xüsusilə də yağ dəyişikliyinin vaxtında edilməməsidir. Anam Barkan bildirir:
“Avtomobillərin 200 min kilometrə çatmadan sıradan çıxmasının əsas səbəblərindən biri yağ dəyişikliyinə laqeyd yanaşmaqdır. Halbuki müasir avtomobillər texniki xidmət vaxtında yerinə yetirildiyi halda 300 min kilometrdən artıq yol qət edə bilir”.

Mütəxəssislərin izahına görə, mühərrik yağı yalnız hərəkət edən hissələrin yağlanmasını təmin etmir, həm də istiliyin azalmasında və aşınma zamanı yaranan metal hissəciklərin mühərrikdən uzaqlaşdırılmasında mühüm rol oynayır. Vaxtında dəyişdirilməyən yağ qalınlaşaraq mühərrikdə lil təbəqəsi yaradır. Bu lil mühərrikin vacib yağ kanallarını tıxayır və nəticədə eksantrik mili, rulmanlar kimi əsas komponentlər yağsız qalaraq sürətlə köhnəlir. Belə halda mühərrikin geri dönməz və baha başa gələn nasazlıqları qaçılmaz olur.

Ekspert qeyd edir ki, bu “səssiz təhlükə”nin qarşısını almaq çətin deyil. Sadəcə yağ dəyişikliyini vaxtında etmək kifayətdir. Avtomobil istehsalçılarının əksəriyyəti yağın hər 12-16 min kilometrdən bir dəyişdirilməsini tövsiyə edir.

Barkan sürücülərə xatırladır: “Mühərrikin ömrünü uzatmaq üçün cəmi bir neçə saat çəkən bu texniki xidməti vaxtında yerinə yetirmək lazımdır. Bu kiçik addım avtomobilin uzunömürlü olmasında həlledici rol oynayır”.

Eltac Zülfüqaroğlu