Tıxacda qəfil əyləcə basmaq qəza ilə nəticələnə bilər – Aqil Rəhimovdan XƏBƏRDARLIQ - VİDEO

Paytaxt yollarında müşahidə olunan əsas problemlərdən biri də yeni sürücülük hüququ əldə edənlərin tıxac zamanı etdiyi səhvlərlə bağlıdır. 

Avtosfer.az-ın müşahidələrinə əsasən, xüsusilə sıxlıqda qaz pedalına həddən artıq basmaq və sonra kəskin əyləc tətbiq etmək təhlükəli situasiyalara yol aça bilər.
Mövzu ilə bağlı qəza əleyhinə kursların məşqçisi Aqil Rəhimov bu barədə bildirib ki, burada hələ təzə avtomobil sürməyə başlayanların səhvi ondadır ki, onlar çox vaxt qazı verirlər və qabaqdakı maşına çatanda kəskin əyləc basırlar:

“Əslində belə olmamalıdır. Qabaqdakı maşın hərəkətə başladı, biz də yüngül şəkildə sürətlənirik, amma dərhal əyləcə basmırıq, yalnız zəruri olanda basırıq. Tıxacda elə əyləcləmək lazımdır ki, arxadan gələn avtomobil bizə çırpılmasın”.

A.Rəhimovun sözlərinə görə, ideal əyləcləmə zamanı həm sürücünün, həm də sərnişinlərin başı tərpənməməlidir:

“Qazı çox verib, sonra kəskin əyləc basmaq düzgün deyil. Ən yaxşı üsul odur ki, maşını yüngül hərəkətə gətiririk, sonra lazım olanda əyləcə basırıq. Bunun üstünlüyü ondan ibarətdir ki, əyləc lampalarımız yanır və arxadan gələn sürücü də sürəti artırmağa cəsarət etmir. Beləcə, həm özümüzü, həm də başqalarını qorumuş oluruq”.

Eltac Zülfüqaroğlu