Yük maşınlarına "polka" yığdırmaq qanunsuzdur? - Qaydalar belə deyir

Son günlər yük avtomobillərinin sürücüləri arasında bu sual tez-tez müzakirə olunur: arxa bortda polka yığmaq olarmı, ya yox?

Yol polisi belə hallarda sürücülərə xəbərdarlıq edir və bildirir ki, bu, “konstruksiya dəyişikliyi”dir və mütləq şəkildə qeydiyyat şəhadətnaməsinə yazılmalıdır. Əks halda avtomobil duracağa yerləşdirilir. Amma mütəxəssislər və mövcud qanunvericilik bunun tam əksini deyir.

Qanunvericiliyə əsasən, konstruksiya dəyişikliyi avtomobilin mühərrikində, ban və şassi nömrəsində, oturacaq yerlərində, rəngində və digər əsas texniki parametrlərində dəyişiklik edildikdə baş verir. Arxa bortda polka yığılması isə avtomobilin texniki göstəricilərinə heç bir təsir etmir. Bu sadəcə yükün yığılma və daşınma formasını asanlaşdırır. Əsasən çörək daşınmasında, müəyyən xırdavat məhsulları daşınmasında geniş istifadə olunur. Yük yerində bu cür polkanın yığılması yükün daşımasını sadələşdirir və bu polkalar bortun içində qaldığı üçün heç kimə maneə yaratmır.

Çox təəssüf ki, son zamanlar avtomobillərə edilən bir çox dəyişikliyə görə irad bildirilir və bunun qanunsuz olduğunu deyərək duracağa yerləşdirirlər. Bu cür yanaşma doğru hesab olunmur. Mütəxəssislərin sözlərinə görə, arxa bortda polkanın quraşdırılması nəqliyyat vasitəsinin normativ tələblərinin pozulması

hesab olunmur. Deməli, belə halda həmin dəyişikliyin qeydiyyat şəhadətnaməsinə yazılmasına da ehtiyac yoxdur. Əgər yük maşınının tipi sərnişin daşınması üçün dəyişdirilirsə və yaxud tam əksi baş verirsə, bu zaman qeydiyyat şəhadətnaməsinə əlavə olunmalıdır. Digər hallarda belə dəyişikliyin tələb edilməsi, sürücülərin yersiz şəkildə incidilməsi düzgün hesab olunmur.

Fərid