Avtobus zolaqlarına bu halda girdikdə cərimə edilməyəcəksiniz – RƏSMİ - VİDEO

Son vaxtlar paytaxtda avtobus zolaqları ilə bağlı sürücülər arasında çaşqınlıq və narazılıq müşahidə olunur. Bir çox taksi sürücüsü avtobus zolaqlarına daxil olaraq müştəri mindirib-düşürərkən cərimələnmələrindən şikayət edir.

Avtosfer.az xəbər verir ki, məsələ ilə bağlı “Azərbaycan Radiosu”nun ünvanladığı sualı Baş Dövlət Yol Polisi idarənin inspektoru, polis baş leytenantı Elvin Hacıyev cavablandırıb. O bildirib ki, avtobus zolaqlarına – hansı ki, adi nəqliyyat vasitələrinin daxil olması qadağandır – iki istisna hal mövcuddur:

“Birinci hal: əgər zolaq digər zolaqlardan 1.5 qırıq-qırıq xətlə ayrılıbsa, başqa nəqliyyat vasitələrinin bu zolaqda hərəkəti qadağan edilmir. Ümumi istifadədə olan nəqliyyat vasitələrinə maneə yaratmamaq şərtilə yalnız sərnişin mindirmək və düşürmək üçün bu zolağa keçib dayanmaq və dərhal hərəkətə başlayıb zolağı tərk etmək olar. İkinci hal: yalnız yoldan çıxış və yola giriş yerlərində, 1.11 nişanı ilə işarələnmiş hissələrdə bu zolağa qismən daxil olub müvafiq manevrlər etmək mümkündür.

Elvin Hacıyev onu da qeyd edib ki, bu qaydaların pozulması halında sürücülər 100 manat məbləğində cərimə və 2 cərimə balı ilə üzləşirlər”.

Eltac Zülfüqaroğlu