Avtomobili yaxınlarına vermək üçün etibarnamə ləğv edilə bilər? – TƏKLİF – VİDEO

Azərbaycanda avtomobildən müvəqqəti istifadə üçün notarial etibarnamə tələbinin yenidən nəzərdən keçirilməsi təklif olunur.

Avtosfer.az xəbər verir ki, nəqliyyat eksperti Eldəniz Cəfərov “Xəzər TV”yə açıqlamasında avtomobilin idarə edilməsinin etibarnamə ilə bağlı mövcud qaydaların müasir texnologiyalar fonunda yenidən qiymətləndirilməsinin vacibliyini bildirib.

Ekspert hesab edir ki, ailə üzvləri və yaxın insanlar arasında avtomobildən istifadə üçün ayrıca etibarnamə tələb olunması artıq köhnəlmiş praktikadır.

“Bu gün ata nə üçün öz oğluna, qızına və ya həyat yoldaşına avtomobili idarə etmək üçün etibarnamə verməlidir? Yaxud kimsə yaxın dostuna avtomobili sürmək üçün mütləq etibarnamə əsasında verməlidir? Düşünürəm ki, bu artıq köhnə praktikadır və bundan imtina etməyin dövrü gəlib çatır”, – deyə Eldəniz Cəfərov bildirib.

Müasir dövrdə avtomobillərin müvəqqəti istifadəsinin rəqəmsal platformalar vasitəsilə tənzimlənməsi artıq mümkündür. Vətəndaşlar müxtəlif onlayn xidmətlərdən istifadə etməklə avtomobili müəyyən müddətə icarəyə götürə və heç bir notarial sənəd olmadan idarə edə bilirlər.

Eldəniz Cəfərov Azərbaycanda da bu istiqamətdə müəyyən təcrübənin formalaşdığını diqqətə çatdırıb. O, Bakıda fəaliyyət göstərən “carsharing” xidmətlərini nümunə göstərərək bildirib ki, istifadəçi mobil tətbiq vasitəsilə avtomobili onlayn şəkildə icarəyə götürür, müəyyən marşrut üzrə idarə edir və daha sonra avtomobili təhvil verir.

Ekspertin fikrincə, bu cür rəqəmsal mexanizmlər avtomobildən müvəqqəti istifadə hüququnun daha operativ və çevik şəkildə tənzimlənə biləcəyini göstərir.

“Hazırda mövcud texnoloji imkanlar fonunda notarial etibarnamə tələbinin zəruriliyi yenidən qiymətləndirilməlidir. Digər ölkələrin təcrübəsi öyrənilməli və daha müasir, operativ həll yolları tətbiq olunmalıdır”, – deyə Eldəniz Cəfərov vurğulayıb.

Eltac Zülfüqaroğlu