Bakıda bəzi parklanma yerlərinə müvəqqəti məhdudiyyət tətbiq edilir

Şəhərdə avtomobillərin parklarınma yerlərinə giriş-çıxışı və parklanma ilə bağlı tətbiq edilən yeni məhdudiyyətlər ictimaiyyət arasında geniş müzakirələrə səbəb olub. Xüsusilə paytaxt ərazisində bəzi küçə və parkların yaxınlığında avtomobillərin hərəkətinə qoyulan məhdudiyyətlər, eləcə də parklanma qaydalarının sərtləşdirilməsi sakinlər tərəfindən fərqli qarşılanır. Məlumata görə, Bakının bir neçə ərazisində nəqliyyat vasitələrinin parklanmasına müvəqqəti məhdudiyyət tətbiq edilir. Bu addım paytaxtda keçiriləcək 13-cü Ümumdünya Şəhərsalma Forumu (WUF13) ilə əlaqədardır. Məhdudiyyətlərin əsas məqsədi tədbir müddətində nəqliyyatın hərəkətini tənzimləmək, təhlükəsizliyi təmin etmək və şəhər infrastrukturunun daha səmərəli idarə olunmasına şərait yaratmaqdır.
Mövzu ilə bağlı nəqliyyat məsələləri üzrə ekspert Eldəniz Cəfərov Avtosfer.az-a bildirib ki, tətbiq edilən qərarlar daimi xarakter daşımır:

“Bunlar parklanma yerləridir, avtomobillərin dayandığı ərazilərdir və tətbiq olunan məhdudiyyət müvəqqətidir. Məlumdur ki, ölkəmizdə irimiqyaslı beynəlxalq tədbir keçirilir və bununla bağlı bəzi parklanma yerlərində müvəqqəti olaraq məhdudiyyət tətbiq olunub. Tədbir yekunlaşdıqdan sonra həmin parklanma yerlərində yenidən avtomobil saxlamaq mümkün olacaq”.
Fatimə Dadaşova