Bakıda yol kənarını “özəlləşdirdilər” – Sürücülər maşın saxlaya bilmədi - VİDEO

Paytaxtın Binəqədi rayonu, Biləcəri qəsəbəsində yerləşən Boksol yolunda sürücülərin narazılığına səbəb olan hal qeydə alınıb.

Avtosfer.az-ın məlumatına görə, bu barədə ərazidən keçən sürücülərdən biri sosial şəbəkədə görüntülər paylaşıb. Kadrlardan görünür ki, yolun kənarına təkərlər və daşlar düzülərək həmin hissədə avtomobillərin dayanmasının qarşısı alınıb.

Paylaşımı edən sürücü iddia edib ki, sözügedən ərazidə fəaliyyət göstərən obyektlərdən birinin sahibi bu addımı atıb. O bildirib ki, yolun kənarı ictimai istifadəyə aid ərazi olduğundan hər hansı şəxs tərəfindən özəlləşdirilə və ya digər sürücülərin istifadəsinə məhdudiyyət qoyula bilməz.

Qeyd edək ki, ümumi istifadədə olan yol və küçə kənarlarının qanunsuz şəkildə bağlanması, müxtəlif əşyalarla zəbt edilməsi yolverilməzdir. Belə hallarla qarşılaşan vətəndaşlar aidiyyəti qurumlara, o cümlədən polis orqanlarına və yerli icra hakimiyyətinə müraciət edə bilərlər. Aidiyyəti qurumlar tərəfindən həmin maneələrin götürülməsi və qanun pozuntusuna hüquqi qiymət verilməsi təmin edilməlidir.

Nərmin