Başını avtomobilin lyukudnan çıxarmaq cərimə səbəbidir? – EKSPERTDƏN AÇIQLAMA - FOTO

Yay aylarının gəlməsi ilə avtomobil istifadəçiləri nəqliyyat vasitələrinin lyuklarını açıq saxlayaraq hava almağa və sərinləməyə üstünlük verirlər.
Avtosfer.az xəbər verir ki, son zamanlar bəzi sürücü və sərnişinlərin təhlükəli vərdişə lyukdan başlarını və ya bədənlərinin bir hissəsini çölə çıxarmağa meyil etməsi narahatlıq doğurur.

Bu kimi hallara əsasən paytaxt yollarında daha tez-tez rast gəlinməyə başlanıb. Xüsusilə gənclər arasında "əyləncə" və ya video çəkiliş məqsədilə edilən bu davranış həm şəxsin öz həyatı, həm də yolda olan digər hərəkət iştirakçıları üçün ciddi təhlükə yaradır.

Məsələ ilə bağlı nəqliyyat eksperti Eldəniz Cəfərov saytımıza açıqlamasında bildirib ki, avtomobil hərəkətdə olduğu zaman sürücü və ya sərnişinin nəqliyyat vasitəsinin damındakı lyukdən (sunroof) başını və ya digər bədən hissələrini çıxarması qanunla qadağandır. 
"Bu qadağa, ilk növbədə, yol hərəkət iştirakçılarının xüsusilə də avtomobildə olan şəxslərin həyat və sağlamlığını qorumaq məqsədi daşıyır. Bu səbəbdən, sərnişinlər və sürücülər avtomobilin hərəkəti zamanı təhlükəsizlik qaydalarına ciddi şəkildə əməl etməli, lyukdən və ya pəncərədən baş və ya bədən çıxarmamalıdırlar. Bu, yalnız özlərinin deyil, həm də digər yol iştirakçılarının təhlükəsizliyini təmin etmək baxımından vacibdir".
Əgər sərnişin və ya sürücü lyukdan başını və ya bədəninin hər hansı hissəsini avtomobil çölünə çıxararsa, İnzibati Xətalar Məcəlləsinin 338.3-cü maddəsinə əsasən 30 manat cərimə olunacaq.

Fidan