Binanın girişini zəbt edən qadın sürücü sakinləri boğaza yığdı - VİDEO

Masazır qəsəbəsi, “Qurtuluş 93” yaşayış kompleksində dayanma-durma qaydalarını pozan sürücü sakinlərin narazılığına səbəb olub.

Bu barədə izləyicilərdən biri Avtosfer.az-ın “Whatsapp” xəttinə video göndərərək ətraflı məlumat verib. Hadisə yaşayış kompleksinin 106 nömrəli binasının giriş hissəsində qeydə alınıb.

Kadrlardan görünür ki, 45-BK-869 dövlət qeydiyyat nişanlı “Nissan” markalı avtomobil binanın girişinə yaxın hissədə saxlanılıb. İzləyicinin sözlərinə görə, ərazidə kifayət qədər boş yer olmasına baxmayaraq həmin avtomobil hər gün eyni yerdə park edilir. Nəticədə sakinlərin binaya rahat giriş-çıxışına maneə yaranır.

Bildirilir ki, xüsusilə uşaq arabası ilə hərəkət edən, eləcə də əllərində yük olan sakinlər binaya daxil olub-çıxarkən çətinliklə üzləşirlər. Şikayətçinin iddiasına əsasən, bina sakinləri dəfələrlə qadın sürücüyə iradlarını bildirərək avtomobili həmin ərazidə saxlamamasını xahiş etsələr də, vəziyyət dəyişməyib.

Qeyd edək ki, yaşayış binalarının giriş-çıxış hissələrinin nəqliyyat vasitələri ilə tutulması piyadaların sərbəst hərəkətinə mane olmaqla yanaşı, fövqəladə hallarda təxliyə və operativ xidmətlərin əraziyə girişini də çətinləşdirə bilər. Bu səbəbdən sürücülər avtomobillərini digər hərəkət iştirakçılarına və piyadalara mane olmayacaq şəkildə park etməlidirlər.

Nərmin