Binəqədidə “şou” göstərmək istəyən sürücü avtomobili işıq dirəyinə çırpdı - VİDEO

Paytaxtın Binəqədi rayonunda yol hərəkəti qaydalarının kobud şəkildə pozulması yol-nəqliyyat hadisəsinə səbəb olub.

Avtosfer.az-ın məlumatına görə, hadisənin görüntüləri sosial şəbəkədə yayılıb. Kadrlardan görünür ki, 90-UR-971 dövlət nömrə nişanlı “Toyota Prius” markalı avtomobilin sürücüsü sıx yaşayış məntəqəsinin yerləşdiyi ərazidə yüksək sürətlə hərəkət edərək döngəyə daxil olur. Daha sonra sürücü avtomobili sürüşdürmək və “şou” nümayiş etdirmək məqsədilə təhlükəli manevr edir.

Lakin bu zaman o, nəqliyyat vasitəsinə nəzarəti itirərək avtomobili yol kənarındakı işıq dirəyinə çırpır. Hadisə nəticəsində avtomobilə maddi ziyan dəyib.

Qeyd edək ki, yaşayış evlərinin yerləşdiyi ərazilərdə yüksək sürət və təhlükəli manevrlər təkcə sürücünün öz həyatı üçün deyil, ətrafda olan piyadalar və digər hərəkət iştirakçıları üçün də ciddi risk yaradır. Belə davranışlar inzibati məsuliyyətə səbəb olmaqla yanaşı, daha ağır nəticələrə gətirib çıxara biləcək təhlükəli hərəkət hesab olunur.

Nərmin