Biri qəza şəraiti yaratdı, digəri motosikleti vurub getdi – ŞİKAYƏT - VİDEO

Paytaxtın Sabunçu rayonunda yol-nəqliyyat hadisəsi baş verib.

Bu barədə zərərçəkmiş sürücü hadisənin görüntülərini Avtosfer.az-ın “WhatsApp” ünvanına göndərərək məlumat verib. Hadisə sentyabrın 24-də saat 14:20 radələrində Şəhər şosesində qeydə alınıb.

Kadrlardan göründüyü kimi, 77-ZE-185 dövlət nömrə nişanlı “Lada” markalı avtomobilin sürücüsü hərəkətdə olan motosikleti nəzərə almadan sağ zolağa keçməyə çalışır. Bu zaman o, motosikletçiyə qəza şəraiti yaradır.

Toqquşmadan yayınmaq üçün moto sürücü qəfil tormozlayır. Lakin bu dəfə arxadan gələn 90-RO-676 dövlət nömrə nişanlı “Lexus” markalı avtomobilin sürücüsü ara məsafəsini düzgün saxlamadığı üçün motosikleti vurur.

Nəticədə motosikletə maddi ziyan dəyir. Hadisədən sonra moto sürücü nəqliyyat vasitəsini yolun kənarına sürür. Ardınca “Lada”nı idarə edən şəxs onun yanına gələrək vəziyyətlə maraqlanıb və motosikletə ziyan dəyib-dəymədiyini soruşur. 

Bir qədər sonra “Lexus”un sürücüsü də ona yaxınlaşır. Motosikletçi ona qəzanın necə baş verdiyini izah etsə də, sürücü gözləmədən yoluna davam edir.

Nərmin