Dar yolda parklanan maşınlar hərəkətə mane oldu; sürücü şikayət etdi - VİDEO

Paytaxtın “Koroğlu” metro stansiyası yaxınlığında yerləşən “Bravo” market ətrafında avtomobillərin park edilməsi ilə bağlı narazılıq yaranıb.

Avtosfer.az xəbər verir ki, yük maşını sürücülərindən biri ərazidə avtomobillərini saxlayan sürücülərə video vasitəsilə müraciət edib. O bildirib ki, bəzi sürücülər avtomobillərini marketin yan hissəsində park etdiklərinə görə yük maşınlarının hərəkəti çətinləşir.

Sürücü qeyd edib ki, onlar marketə məhsul gətirdikləri zaman həmin ərazidən çıxmaqda ciddi çətinliklərlə üzləşirlər. Bu səbəbdən o, avtomobil sahiblərindən xahiş edib ki, nəqliyyat vasitələrini marketin yan hissəsində deyil, Bravo marketin parkinq yerində saxlasınlar.

Onun sözlərinə görə, sürücülər avtomobillərini düzgün park etsələr, həm yük maşınlarının hərəkəti rahatlaşar, həm də ərazidə tıxac və sıxlıq yaranmaz.

Sözügedən görüntülər sosial şəbəkələrdə də müzakirələrə səbəb olub. Bəzi istifadəçilər yük maşını sürücüsünün iradını haqlı hesab etsələr də digərləri ərazidə parkinq yerlərinin məhdud olduğunu bildiriblər.

Eltac Zülfüqaroğlu