Dörd gün əvvəl aldığı sürücülük vəsiqəsi sərxoş olduğu üçün əlindən alındı - Türkiyədə - VİDEO

İstanbulun Kadıköy rayonunda keçirilən genişmiqyaslı yol polisi yoxlamaları zamanı sürücülük vəsiqəsini cəmi 4 gün əvvəl alan motosiklet sürücüsü sərxoş vəziyyətdə saxlanılıb.

Avtosfer.az xarici mediaya istinadla xəbər verir ki, helikopter dəstəyi ilə aparılan reyd zamanı V.A. adlı sürücünün alkoqol testindən 0,89 promil nəticə verdiyi müəyyən edilib. Araşdırma zamanı onun motosikletinin texniki baxışdan da keçmədiyi məlum olub.

Qayda pozuntularına görə sürücüyə ümumilikdə 27 min lirədən çox cərimə tətbiq edilib, sürücülük vəsiqəsi əlindən alınıb, motosikleti isə cərimə meydançasına aparılıb.

Cərimələrdən sonra jurnalistlərə danışan sürücü, "Sürücülük vəsiqəsini alanı 4 gün olub, həm vəsiqə getdi, həm də motosiklet. 50 milyard da yazsalar, 100 milyard da yazsalar, artıq ediləcək bir şey yoxdur" deyərək vəziyyətindən gileylənib.

Sürücünün həmin anları kameralara əks olunub./Sonxeber.az