Əks yola çıxan skuter sürücüsü qəzaya saniyələr qalmış xilas oldu - VİDEO

Paytaxtın Binəqədi rayonu, 7-ci mikrorayon ərazisində qayda pozan skuter sürücüsü kameraya düşüb.

Avtosfer.az-ın məlumatına görə, hadisə avqustun 1-də saat 15:48 radələrində qeydə alınıb.

Belə ki, skuteri idarə edən gənc əks istiqamətli yola çıxaraq axına qarşı hərəkət edib. Görüntülərdən məlum olur ki, bu zaman o, qarşıdan gələn avtomobillə toqquşma təhlükəsi yaradıb. Skuter sürücüsü son anda sola manevr etməklə qəzadan yayına bilib.

Qeyd edək ki, yolun hərəkət istiqamətinin əksinə hərəkət etmək həm skuter sürücüsünün, həm də digər hərəkət iştirakçılarının həyatı üçün ciddi təhlükə yaradır. Qanunvericiliyin tələblərinə əsasən, fərdi hərəkət vasitələrini idarə edən şəxslər də hərəkətin istiqamətinə, yol nişanlarının və nişanlanma xətlərinin tələblərinə əməl etməyə borcludurlar.

Nərmin