“Gelandewagen”i yolayrıcında və keçidin yaxınlığında saxlayıb yoxa çıxdı - VİDEO

Paytaxtın Nərimanov rayonunda dayanma-durma qaydalarını pozan sürücü digər hərəkət iştirakçılarına çətin anlar yaşadıb.

Bu barədə görüntülər Avtosfer.az-ın “WhatsApp” qaynar xəttinə daxil olub. Bildirilib ki, hadisə iyulun 16-da saat 21:57 radələrində Ağa Nemətulla və Təbriz küçələrinin kəsişməsində qeydə alınıb.

Kadrlardan görünür ki, 99-XD-939 dövlət qeydiyyat nişanlı “Mercedes Gelandewagen” markalı avtomobilin sürücüsü nəqliyyat vasitəsini yolayrıcında və piyada keçidinə yaxın ərazidə saxlayıb. Bu səbəbdən həm sürücülərin hərəkəti məhdudlaşıb, həm də piyadaların yolu təhlükəsiz şəkildə keçməsində çətinlik yaranıb.

Şikayətçinin sözlərinə görə, avtomobil uzun müddət həmin yerdə qalıb və sürücü nəqliyyat vasitəsinin yanında olmayıb.

Qeyd edək ki, qanunvericiliyə əsasən, piyada keçidlərində, onların qarşısında və kəsişmələrdə dayanma və durma qadağandır. Bu cür qayda pozuntuları digər hərəkət iştirakçılarının görmə bucağını məhdudlaşdırmaqla yanaşı, qəza riskini də artırır və inzibati məsuliyyət yaradır.

Nərmin