Günəşlidə avtobus sürücüsü əks yola çıxıb maşının üzərinə sürdü - VİDEO

Paytaxtın Suraxanı rayonu, Günəşli qəsəbəsində kobud qayda pozan avtobus sürücüsü kameraya düşüb.

Avtosfer.az-ın məlumatına görə, hadisə avqustun 9-da saat 21:36 radələrində qeydə alınıb.

Görüntülərdən məlum olur ki, 46 nömrəli müntəzəm marşrut xətti üzrə hərəkət edən “BYD” markalı avtobusun sürücüsü qoşa xəttin tələbini pozaraq əks istiqamətli yola çıxıb. Nəticədə qarşı istiqamətdən gələn avtomobil üçün qəza şəraiti yaranıb. Təhlükəylə üz-üzə qalan sürücü operativ şəkildə sağa manevr edərək baş verəcək qəzanın qarşısını alıb.

Xatırladaq ki, qoşa xəttin üzərindən keçərək əks hərəkət zolağına çıxmaq ən təhlükəli qayda pozuntularından hesab olunur. Xüsusilə sərnişindaşıma ilə məşğul olan sürücülərin bu cür riskli manevrlərə yol verməsi eyni anda həm avtobusdakı sərnişinlərin, həm də digər hərəkət iştirakçılarının həyatını təhlükə altına qoyur.

Nərmin