İşıqforda telefondan istifadə edən sürücü cərimələnə bilər? – AÇIQLAMA - VİDEO

Son günlər sosial şəbəkələrdə və bəzi media orqanlarında svetoforda dayanan sürücünün mobil telefondan istifadə etməsinin inzibati məsuliyyət yaratdığı ilə bağlı məlumatlar yayılıb.

Avtosfer.az xəbər verir ki, məsələ ilə bağlı nəqliyyat eksperti Eldəniz Cəfər bildirib ki, qanunvericiliyin yanlış şərh edilməsi sürücülər arasında çaşqınlıq yaradır.

Yol hərəkəti qaydalarında məsuliyyət yaradan hal nəqliyyat vasitəsinin hərəkətdə olduğu zaman sürücünün telefonu əlində tutaraq istifadə etməsidir.

"Qanunlar bəzən təhrif olunur və nəticədə sürücülər barədə əsassız fikirlər formalaşdırılır. Bu yaxınlarda bəzi media orqanlarında svetoforda dayanan sürücünün əlində telefonla danışmasının da qayda pozuntusu olduğu iddia edildi. Halbuki qanunvericilikdə açıq şəkildə göstərilir ki, məsuliyyət nəqliyyat vasitəsi hərəkətdə olarkən sürücünün telefonu əlində tutaraq istifadə etməsinə görə yaranır", – deyə Eldəniz Cəfər bildirib.

Svetoforun qırmızı işığında dayanmış avtomobil hərəkət etmir və bu vəziyyət hərəkətdə olan nəqliyyat vasitəsi kimi qiymətləndirilə bilməz.

Sürücü zərurət yarandıqda avtomobili yolun sağ kənarında saxlayaraq mühərriki söndürmədən belə telefonla danışa bilir və bu, qanunvericiliyə zidd hesab edilmir. Eyni yanaşma svetoforda dayanmış avtomobilə də şamil olunur.

Eldəniz Cəfər vurğulayıb ki, sürücülər yol hərəkəti qaydaları ilə bağlı məlumatları yalnız rəsmi mənbələrdən əldə etməli, qanunvericiliyin yanlış şərhlərinə əsaslanmamalıdırlar. Hər bir inzibati məsuliyyət qanunvericilikdə göstərilən konkret norma əsasında tətbiq edilməlidir.

Eltac Zülfüqaroğlu