Maşını ikinci cərgədə saxlayıb yoxa çıxan sürücü 1 saatdan çox yolu bağladı - VİDEO

Paytaxtın Nərimanov rayonu, Əhməd Rəcəbli küçəsində dayanma-durma qaydasını pozan sürücü digər hərəkət iştirakçısına çətinlik yaradıb.

Avtosfer.az xəbər verir ki, hadisə fevralın 24-də səhər saatlarında qeydə alınıb.

Kadrlardan göründüyü kimi, 77-QP-591 dövlət nömrə nişanlı “KIA” markalı avtomobil yolun hərəkət hissəsində ikinci cərgədə saxlanılıb və sürücü ərazini tərk edib.

Nəticədə sağ zolaqda park edilmiş nəqliyyat vasitəsinin ərazidən çıxışı əngəllənib.

Şikayətçi qeyd edib ki, avtomobildə sürücü ilə əlaqə üçün hər hansı məlumat olmadığından onu tapa bilməyib.

Məsələ ilə bağlı aidiyyəti qurumlara məlumat verilsə də, sürücünün qısa müddətdə tapılması mümkün olmayıb. Bu səbəbdən vətəndaş bir saatdan artıq ərazidə gözləməli olub.

Xatırladaq ki, ikinci cərgədə saxlanılan avtomobil təkcə inzibati məsuliyyət məsələsi deyil, eyni zamanda digər hərəkət iştirakçılarının vaxt itkisinə və yol infrastrukturunun səmərəsiz istifadəsinə səbəb olur.

Belə hallarda sürücülərin nəqliyyat vasitəsini qısa müddətə tərk edərkən belə, digər avtomobillərin hərəkət trayektoriyasını nəzərə alması və ən azı operativ əlaqə üçün əlaqə nömrəsi yerləşdirməsi həm hüquqi, həm də etik baxımdan vacib məsuliyyətdir.

Nərmin