Moped sürücüləri qırmızıda keçib ölümlə üz-üzə qaldılar - VİDEO

Bakıda yol hərəkəti qaydalarını kobud şəkildə pozan moped sürücüləri təhlükəli vəziyyət yaradıblar. Avtosfer.az xəbər verir ki, hadisə fevralın 25-də paytaxtın 28 May küçəsilə Aleksandr Puşkin küçələrinin kəsişməsində baş verib.
Belə ki, iki moped sürücüsü qırmızı işıqda keçərək avtomobillərin intensiv hərəkətdə olduğu yola qəfil daxil olublar. Nəticədə qəza riski yaranıb.
Mopedlərin yol hərəkəti qaydalarına məhəl qoymadan hərəkət etməsi və təhlükəsizlik qaydalarına əməl etməməsi son vaxtlarda tez-tez gündəmə gələn məsələlərdəndir. Xüsusilə də, motosikletlərdən fərqli olaraq, mopedlərin üzərində qeydiyyat nişanı daşımaması, onların yol hərəkəti qaydalarını pozaraq istədikləri kimi hərəkət etməsinə şərait yaradır. 
Qeyd edək ki, mopedlərin rəsmi qeydiyyata alınması və onlara dövlət nömrə nişanlarının verilməsi yol hərəkətində intizamın artırılmasına kömək edə bilər.

Nərmin