Nasaz “QAZ” prospektdə təhlükə yaratdı – Sürücülər qəzadan son anda xilas oldu - VİDEO

Paytaxtın 8 Noyabr prospektində qayda pozan sürücü digər hərəkət iştirakçıları üçün təhlükəli vəziyyət yaradıb.

Avtosfer.az-ın məlumatına görə, hadisə iyulun 14-də saat 16:05 radələrində qeydə alınıb. Belə ki, 10-CC-233 dövlət nömrə nişanlı “QAZ-3110” markalı avtomobilin sürücüsü nəqliyyat vasitəsini prospektin ən sağ hərəkət zolağında saxlayıb. Bu isə arxadan gələn avtomobillər üçün qəza şəraiti yaradıb.

Görüntülərdən məlum olur ki, həmin zolaqla hərəkətdə olan “Toyota Aqua” markalı avtomobilin sürücüsü son anda sol zolağa manevr edərək dayanmış nəqliyyat vasitəsinə çırpılmaqdan xilas olub. Nəticədə sol zolaqda hərəkət edən və hadisəni videoya çəkən avtomobil üçün də təhlükəli vəziyyət yaranıb.

Kadrlarda “QAZ” markalı avtomobilin sürücüsünün nəqliyyat vasitəsinin nasaz olduğunu bildirmək məqsədilə əlini pəncərədən çıxararaq arxadan gələn sürücülərə xəbərdarlıq etdiyi görünür.

Qanunvericiliyin tələblərinə əsasən, nəqliyyat vasitəsi nasazlaşdıqda və ya qəza səbəbindən dayanmalı olduqda, sürücü ilk növbədə qəza işıq siqnallarını yandırmalı, avtomobili mümkün qədər yolun hərəkət hissəsindən kənara çəkməli və qəza dayanma nişanını müəyyən olunmuş məsafədə yerləşdirməlidir.

Nərmin