Nərimanovda qayda pozan piyada və sürücü təhlükəli vəziyyət yaratdı - VİDEO

Paytaxtın Nərimanov rayonu, Həsən Əliyev küçəsində təhlükəli vəziyyət qeydə alınıb.

Avtosfer.az-ın məlumatına görə, hadisə bir müddət əvvəl səhər saatlarında baş verib.

Kadrlardan görünür ki, qadın piyada yolu təyin olunmamış yerdən keçməyə çalışır. Bu zaman hərəkətdə olan “Toyota” markalı avtomobilin sürücüsü nəqliyyat vasitəsini saxlayaraq piyadaya yol verir. Avtomobilin arxasında hərəkət edən motosikletçi isə sürücünün dayanmasına etiraz edərək narazılığını bildirir.

Bu zaman sağ zolaqla hərəkətdə olan digər motosikletçi dayanmadan hərəkət edir. Görüntülərdən də aydın olur ki, piyada bir qədər də irəliləmiş olsaydı, motosikletçinin onu vurması qaçılmaz ola bilərdi. Beləliklə, həm piyadanın yolun təyin olunmamış hissəsindən keçməsi, həm də motosikletçinin ehtiyatsız davranışı ciddi qəza təhlükəsi yaradıb.

Qanunvericiliyə əsasən, piyadalar hərəkət hissəsini yalnız piyada keçidlərindən, yeraltı və ya yerüstü piyada keçidlərindən keçməlidirlər. 

Eyni zamanda, sürücülərdən biri piyadaya yol vermək üçün dayandıqda digər hərəkət iştirakçıları da vəziyyəti nəzərə almalı, piyadanın təhlükəsiz keçidini təmin etməlidirlər. Əks halda, bu cür davranışlar ağır yol-nəqliyyat hadisələri ilə nəticələnə bilər.

Nərmin