Nərimanovda təhlükəli manevr: Yol verən sürücünü qəza riski ilə üz-üzə qoydu - VİDEO

Paytaxtın Nərimanov rayonu ərazisində, Böyükşor bulvarından Ziya Bünyadov prospektinə qoşulan yolda qayda pozan sürücü kameraya düşüb.

Avtosfer.az-ın məlumatına görə, hadisə iyunun 18-də saat 08:58 radələrində qeydə alınıb. Belə ki, 99-DL-842 dövlət nömrə nişanlı “Mercedes” markalı avtomobilin sürücüsü hərəkət zamanı manevr qaydalarını pozub.

Kadrlardan görünür ki, sürücü əvvəlcə hərəkətdə olduğu zolaqdan sağ zolağa keçir. Bu zaman görüntünü qeydə alan avtomobilin sürücüsü ona yol verir. Lakin “Mercedes”in sürücüsü önündəki nəqliyyat vasitəsini ötmək məqsədilə yenidən sol zolağa qayıdır və bu zaman ona yol verən sürücü üçün qəza şəraiti yaradır.

Xatırladaq ki, yollarda zolaqlar arasında kəskin və ardıcıl manevrlər digər hərəkət iştirakçıları üçün ciddi təhlükə yaradır. Sürücülər manevr etməzdən əvvəl yol vəziyyətini düzgün qiymətləndirməli, məsafə saxlamalı və digər nəqliyyat vasitələrinin hərəkətinə mane olmamalıdırlar.

Nərmin